English
ਸਿਰਫ ਪੁਸ਼ਪਮਾਲਾ ਹੋਵੇਗੀ, ਬਾਕੀ ਸਾਰੇ ਪ੍ਰੋਗਰਾਮ ਰੱਦ ਕਰ ਦਿੱਤੇ ਗਏ ਹਨ
ਲੁੀਧਆਣਾ, 11 ਅਕਤੂਬਰ 2025
ਪ੍ਰੋ.ਮੋਹਨ ਸਿੰਘ ਯਾਦਗਾਰੀ ਫਾਊਂਡੇਸ਼ਨ ਵੱਲੋਂ ਅੱਜ ਇਥੇ ਹੋਈ ਇੱਕ ਅਹਿਮ ਮੀਟਿੰਗ ਵਿੱਚ ਐਲਾਨ ਕੀਤਾ ਗਿਆ ਹੈ ਕਿ 47ਵਾਂ ਪ੍ਰੋ.ਮੋਹਨ ਸਿੰਘ ਯਾਦਗਾਰੀ ਅੰਤਰਰਾਸ਼ਟਰੀ ਸਭਿਅਚਾਰਕ ਮੇਲਾ ਇਸ ਬਾਰ ਸਿਰਫ ਪੁਸ਼ਪਮਾਲਾ ਨਾਲ ਮਨਾਇਆ ਜਾਵੇਗਾ ਜਦੋਂ ਕਿ ਬਾਕੀ ਸਾਰੇ ਪ੍ਰੋਗਰਾਮ ਰੱਦ ਕਰ ਦਿੱਤੇ ਗਏ ਹਨ। ਚੇਅਰਮੈਨ ਗੁਰਨਾਮ ਸਿੰਘ ਧਾਲੀਵਾਲ ਅਤੇ ਪ੍ਰਧਾਨ ਰਾਜੀਵ ਕੁਮਾਰ ਲਵਲੀ ਦੀ ਅਗਵਾਈ ਵਿੱਚ ਹੋਈ ਇਸ ਇਕੱਤਰਤਾ ਵਿੱਚ ਪ੍ਰੋ.ਮੋਹਨ ਸਿੰਘ ਯਾਦਗਾਰੀ ਫਾਊਂਡੇਸ਼ਨ ਦੇ ਸਰਪ੍ਰਸਤ ਪਰਗਟ ਸਿੰਘ ਗਰੇਵਾਲ, ਸਕੱਤਰ ਜਨਰਲ ਡਾ ਨਿਰਮਲ ਜੌੜਾ, ਸਕੱਤਰ ਸਰਗਰਮੀਆਂ ਮਾਸਟਰ ਕਰਮਜੀਤ ਗਰੇਵਾਲ ਅਤੇ ਕਲਾਕਾਰ ਗੁਲਜ਼ਾਰ ਸਿੰਘ ਕਾਲਕਟ ਸਮੇਤ ਅਹੁਦੇਦਾਰ ਅਤੇ ਕਲਾਪ੍ਰੇਮੀ ਹਾਜ਼ਰ ਹੋਏ।
ਗੁਰਨਾਮ ਸਿੰਘ ਧਾਲੀਵਾਲ ਅਤੇ ਰਾਜੀਵ ਕੁਮਾਰ ਲਵਲੀ ਨੇ ਦੱਸਿਆ ਕਿ ਪਿਛਲੇ ਸਮੇਂ ਹੜ੍ਹਾਂ ਵੱਲੋਂ ਕੀਤੀ ਤਬਾਹੀ ਕਾਰਨ ਹੋਏ ਭਾਰੀ ਜਾਨੀ ਅਤੇ ਮਾਲੀ ਨੁਕਸਾਨ ਕਰਕੇ ਲੋਕਾਂ ਦੇ ਮਨ ਦੁੱਖੀ ਹਨ ਅਤੇ ਆਰੀਥਕਤਾ ਨੂੰ ਸੱਟ ਵੱਜੀ ਹੈ।ਉਹਨਾਂ ਕਿਹਾ ਕਿ ਹੜ੍ਹ ਬੇਸ਼ੱਕ ਆਕੇ ਚਲੇ ਗਏ ਪਰ ਉਸ ਦੀ ਦਹਿਸ਼ਤ ਦਾ ਸਹਿਮ ਲੋਕ ਮਨਾਂ ਉੱਤੇ ਅੱਜ ਵੀ ਹੈ।ਅਜਿਹੇ ਹਾਲਾਤ ਵਿੱਚ ਮੇਲੇ ਦੇ ਜਸ਼ਨ ਮਨਾਉਣ ਦੀ ਵਜਾਏ ਅਰਦਾਸ ਕਰਨੀ ਜ਼ਰੂਰੀ ਹੈ ਕਿ ਕੁਦਰਤ ਦਾ ਅਜਿਹਾ ਕਹਿਰ ਮੁੜਕੇ ਕਦੇ ਨਾ ਵਾਪਰੇ।ਮੀਟਿੰਗ ਵਿੱਚ ਉਘੇ ਕਲਾਕਾਰ ਜਸਵਿੰਦਰ ਭੱਲਾ, ਸੰਗੀਤਕਾਰ ਚਰਨਜੀਤ ਅਹੂਜਾ, ਲੇਖਕ ਡਾ ਫਕੀਰ ਚੰਦ ਸ਼ੁਕਲਾ, ਅਲਗੋਜ਼ਾ ਵਾਦਕ ਕਮਲਜੀਤ ਸਿੰਘ ਬੱਗਾ ਅਤੇ ਨੌਜਵਾਨ ਫਨਕਾਰ ਰਾਜਵੀਰ ਜਵੰਦਾ ਦੀ ਬੇਵਕਤੀ ਮੌਤ ਤੇ ਡੂੰਘੇ ਅਫਸੋਸ ਦਾ ਪ੍ਰਗਟਾਵਾ ਕੀਤਾ ਗਿਆ।
ਧਾਲੀਵਾਲ ਅਤੇ ਲਵਲੀ ਅਨੁਸਾਰ ਇਸ ਬਾਰ 18 ਅਕਤੂਬਰ ਦਿਨ ਦਿਨ ਸ਼ਨੀਵਾਰ ਨੂੰ ਪੰਜਾਬੀ ਭਵਨ ਦੇ ਬਾਹਰ ਲੱਗੇ ਪ੍ਰੋਫੈਸਰ ਮੋਹਨ ਸਿੰਘ, ਜਗਦੇਵ ਸਿੰਘ ਜੱਸੋਵਾਲ ਅਤੇ ਜਨਾਬ ਜਸਵੰਤ ਭੰਵਰਾ ਦੇ ਬੁੱਤਾਂ ਤੇ ਪੁਸ਼ਪਮਾਲਾ ਕੀਤੀ ਜਾਵੇਗੀ ।ਇਸ ਉਪਰੰਤ ਜਸਵਿੰਦਰ ਭੱਲਾ, ਚਰਨਜੀਤ ਅਹੂਜਾ,ਡਾ ਫਕੀਰ ਚੰਦ ਸ਼ੁਕਲਾ, ਕਮਲਜੀਤ ਬੱਗਾ ਅਤੇ ਰਾਜਵੀਰ ਜਵੰਦਾ ਨੂੰ ਸ਼ਰਧਾਂਜ਼ਲੀ ਭੇਟ ਕੀਤੀ ਜਾਵੇਗੀ ।ਉਹਨਾਂ ਸਮੂਹ ਕਲਾਕਾਰਾਂ , ਸਾਹਿਤਕਾਰਾਂ ਅਤੇ ਕਲਾ ਪ੍ਰੇਮੀਆਂ ਨੂੰ ਇਸ ਰਸਮ ਵਿੱਚ ਸ਼ਾਮਲ ਹੋਣ ਦੀ ਅਪੀਲ ਵੀ ਕੀਤੀ।
