ਪਟਿਆਲਾ ਪੁਲਿਸ ਦੇ ਸਾਈਬਰ ਸੈਲ ਦੀ ਸਫ਼ਲਤਾ, ਆਨ ਲਾਈਨ ਠੱਗੀਆਂ ਦੇ ਹੁਣ ਤੱਕ 60 ਲੱਖ ਰੁਪਏ ਕਰਵਾਏ ਵਾਪਸ

क्षमा करें, यह समाचार आपके अनुरोध की भाषा में उपलब्ध नहीं है। कृपया यहाँ देखें।

-ਹੁਣ ਤੱਕ ਪ੍ਰਾਪਤ ਹੋਈਆ 1200 ਸ਼ਿਕਾਇਤਾਂ ਹੱਲ ਕਰਨ ‘ਚ ਸਾਈਬਰ ਸੈਲ ਦੀ ਅਹਿਮ ਭੂਮਿਕਾ
-ਤਕਨਾਲੋਜੀ ਦੇ ਯੁੱਗ ‘ਚ ਠੱਗੀਆਂ ਦੇ ਬਦਲੇ ਢੰਗ ਨੇ ਪੁਲਿਸ ਦੇ ਕੰਮ ‘ਚ ਵੀ ਲਿਆਂਦਾ ਬਦਲਾਅ
-ਪਟਿਆਲਾ ਪੁਲਿਸ ਦਾ ਸਾਈਬਰ ਸੈਲ ਬਾਜ਼ ਅੱਖ ਨਾਲ ਇੰਟਰਨੈਟ ‘ਤੇ ਹੋਣ ਵਾਲੇ ਜੁਰਮ ‘ਤੇ ਰੱਖ ਰਿਹਾ ਹੈ ਤਿੱਖੀ ਨਜ਼ਰ: ਐਸ.ਐਸ.ਪੀ.
-ਆਮ ਲੋਕਾਂ ਨੂੰ ਆਨ ਲਾਈਨ ਠੱਗੀਆਂ ਤੋਂ ਸੁਚੇਤ ਕਰਨ ਲਈ ਪਟਿਆਲਾ ਪੁਲਿਸ ਵੱਲੋਂ ਫੇਸਬੁੱਕ ਤੇ ਇੰਸਟਾਗਰਾਮ ਰਾਹੀਂ ਚਲਾਈ ਜਾ ਰਹੀ ਹੈ ਜਾਗਰੂਕਤਾ ਮੁਹਿੰਮ : ਦੁੱਗਲ
ਪਟਿਆਲਾ, 25 ਸਤੰਬਰ:
ਤਕਨਾਲੋਜੀ ਦੇ ਇਸ ਯੁੱਗ ‘ਚ ਆਮ ਲੋਕਾਂ ਨਾਲ ਠੱਗੀਆਂ ਕਰਨ ਦੇ ਤਰੀਕਿਆਂ ‘ਚ ਆਏ ਬਦਲਾਅ ਨੇ ਪੁਲਿਸ ਦੇ ਕੰਮ ਕਾਜ ‘ਚ ਵੀ ਤਕਨੀਕੀ ਬਦਲਾਅ ਲਿਆਂਦਾ ਹੈ, ਜਿਸ ਤਹਿਤ ਪਟਿਆਲਾ ਪੁਲਿਸ ਦੇ ਸਾਈਬਰ ਸੈਲ ਨੇ ਤਕਨਾਲੋਜੀ ਦਾ ਪੂਰਾ ਸਹਾਰਾ ਲੈਂਦਿਆਂ ਇੰਟਰਨੈਟ ਦੇ ਜਰੀਏ ਭੋਲੇ ਭਾਲੇ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾਉਣ ਵਾਲਿਆਂ ‘ਤੇ ਕਾਰਵਾਈ ਕਰਦਿਆ ਆਮ ਲੋਕਾਂ ਦੇ 60 ਲੱਖ ਰੁਪਏ ਵਾਪਸ ਕਰਵਾਏ ਹਨ ਅਤੇ 12 ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਗਿਆ ਹੈ।
ਪਟਿਆਲਾ ਦੇ ਐਸ.ਐਸ.ਪੀ. ਸ੍ਰੀ ਵਿਕਰਮ ਜੀਤ ਦੁੱਗਲ ਨੇ ਸਾਈਬਰ ਸੈਲ ਵੱਲੋਂ ਹੱਲ ਕੀਤੇ ਕੇਸਾਂ ਸਬੰਧੀ ਜਾਣਕਾਰੀ ਦਿੰਦਿਆ ਦੱਸਿਆ ਕਿ ਆਨ ਲਾਈਨ ਠੱਗੀਆਂ ਰਾਹੀਂ ਭੋਲੇ ਭਾਲੇ ਲੋਕਾਂ ਦੀ ਮਿਹਨਤ ਦੀ ਕਮਾਈ ਨੂੰ ਵਾਪਸ ਕਰਵਾਉਣ ‘ਚ ਪਟਿਆਲਾ ਪੁਲਿਸ ਦਾ ਸਾਈਬਰ ਸੈਲ ਅਹਿਮ ਭੂਮਿਕਾ ਨਿਭਾਅ ਰਿਹਾ ਹੈ ਅਤੇ ਹੁਣ ਤੱਕ 1200 ਦਰਖਾਸਤਾਂ ਦਾ ਨਿਪਟਾਰਾ ਕਰਦਿਆ ਆਮ ਲੋਕਾਂ ਦੇ 60 ਲੱਖ ਦੇ ਕਰੀਬ ਪੈਸੇ ਵਾਪਸ ਕਰਵਾਏ ਜਾ ਚੁੱਕੇ ਹਨ।
ਉਨ੍ਹਾਂ ਦੱਸਿਆ ਕਿ ਸਾਈਬਰ ਸੈਲ ਵੱਲੋਂ ਛੇ ਅਹਿਮ ਮੁਕੱਦਮੇ ਵੀ ਟਰੇਸ ਕੀਤੇ ਗਏ ਹਨ ਜਦਕਿ ਇਨ੍ਹਾਂ ਦੀ ਤਫ਼ਤੀਸ਼ ਦੌਰਾਨ ਕਰੀਬ 830 ਗਰਾਮ ਸੋਨਾ ਤੇ ਬੈਕ ਖਾਤਿਆਂ ‘ਚੋਂ ਕਰੀਬ 60 ਲੱਖ ਰੁਪਏ, 742 ਸਿਮ, 26 ਮੋਬਾਇਲ ਸੈਟ, ਕਰੀਬ ਸਾਢੇ 4 ਲੱਖ ਦਾ ਸੋਨਾ, 40 ਹਜ਼ਾਰ ਕੈਸ਼, ਇਕ ਬਲੈਰੋ, ਇਕ ਸਕਾਰਪਿਓ ਗੱਡੀ ਵੀ ਬਰਾਮਦ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ 200 ਬੈਂਕ ਖਾਤਿਆਂ ਵਿੱਚ ਜਮ੍ਹਾਂ 7 ਲੱਖ ਰੁਪਏ ਦੀ ਰਕਮ ਫਰੀਜ ਕਰਵਾਈ ਗਈ ਹੈ ਤੇ ਕੁੱਲ 12 ਦੋਸ਼ੀ ਗ੍ਰਿਫ਼ਤਾਰ ਕੀਤੇ ਗਏ ਹਨ।
ਐਸ.ਐਸ.ਪੀ. ਵਿਕਰਮ ਜੀਤ ਦੁੱਗਲ ਨੇ ਦੱਸਿਆ ਕਿ ਸਾਈਬਰ ਸੈਲ ਵੱਲੋਂ ਆਨ ਲਾਈਨ ਠੱਗੀਆਂ ਦੇ ਤਰੀਕਿਆਂ ਤੋਂ ਆਮ ਲੋਕਾਂ ਨੂੰ ਜਾਗਰੂਕ ਕਰਨ ਲਈ ਇੱਕ ਫੇਸਬੁੱਕ ਪੇਜ ਅਤੇ ਇੰਸਟਾਗਰਾਮ ਅਕਾਊਂਟ ਵੀ ਚਲਾਇਆ ਜਾ ਰਿਹਾ ਹੈ, ਤਾਂ ਜੋ ਆਮ ਲੋਕਾਂ ਨੂੰ ਸਾਈਬਰ ਕਰਾਈਮ ਦਾ ਸ਼ਿਕਾਰ ਹੋਣ ਤੋ ਬਚਾਇਆ ਜਾ ਸਕੇ। ਉਨ੍ਹਾਂ ਦੱਸਿਆ ਕਿ ਪਟਿਆਲਾ ਪੁਲਿਸ ਵੱਲੋਂ ਸਾਈਬਰ ਕਰਾਈਮ ਕਰਨ ਵਾਲਿਆਂ ‘ਤੇ ਬਾਜ਼ ਅੱਖ ਨਾਲ ਤਿੱਖ ਨਜ਼ਰ ਰੱਖੀ ਜਾ ਰਹੀ ਹੈ ਤੇ ਕਿਸੇ ਵੀ ਜ਼ੁਰਮ ਕਰਨ ਵਾਲੇ ਵਿਅਕਤੀ ਨੂੰ ਬਖ਼ਸ਼ਿਆਂ ਨਹੀਂ ਜਾਵੇਗਾ।