English
— ਲਗਾਤਾਰ ਫਸਲ ਦੀ ਨਜਰਸਾਨੀ ਕਰਨ ਅਤੇ ਸਮੇਂ ਸਿਰ ਮਿਲੇ ਨਹਿਰੀ ਪਾਣੀ ਕਾਰਨ ਚੰਗਾ ਝਾੜ ਪ੍ਰਾਪਤ ਕਰੇਗਾ
ਫਾਜ਼ਿਲਕਾ, 7 ਅਕਤੂਬਰ:
ਜੇਕਰ ਇਨਸਾਨ ਮਿਹਨਤ ਕਰੇ ਤਾਂ ਕੁਦਰਤ ਫਲ ਜਰੂਰ ਦਿੰਦੀ ਹੈ। ਅਜਿਹਾ ਹੀ ਹੋਇਆ ਹੈ ਪਿੰਡ ਰੁਹੇੜਿਆਂ ਵਾਲੀ ਦੇ ਸਫਲ ਕਿਸਾਨ ਵਰਿੰਦਰ ਕੁਮਾਰ ਨਾਲ। ਉਸਦੀ ਮਿਹਨਤ ਦੀ ਗਵਾਹੀ ਭਰਦੀ ਹੈ ਉਸਦੀ ਨਰਮੇ ਦੀ ਫਸਲ।
ਪਿੰਡ ਰੁਹੇੜਿਆਂ ਵਾਲੀ ਦਾ ਸਫਲ ਕਿਸਾਨ ਵਰਿੰਦਰ ਕੁਮਾਰ ਦੱਸਦਾ ਹੈ ਕਿ ਉਹ 25 ਏਕੜ ਵਿਚ ਨਰਮੇ ਦੀ ਖੇਤੀ ਕਰਦਾ ਹੈ। ਉਸ ਵੱਲੋਂ ਨਰਮੇ ਦੀਆਂ ਵੱਖ—ਵੱਖ ਕਿਸਮਾਂ ਦੀ ਬਿਜਾਈ ਕੀਤੀ ਗਈ ਹੈ। ਕਿਸਾਨ ਆਖਦਾ ਹੈ ਕਿ ਉਸਨੇ ਵਿਭਾਗ ਦੇ ਕਹੇ ਅਨੁਸਾਰ ਉਹ ਲਗਾਤਾਰ ਆਪਣੀ ਫਸਲ ਦਾ ਨਿਰੀਖਣ ਕਰਦਾ ਰਿਹਾ ਤਾਂ ਜ਼ੋ ਫਸਲ ਤੇ ਗੁਲਾਬੀ ਸੁੰਡੀ ਦਾ ਹਮਲਾ ਨਾ ਹੋ ਸਕੇ। ਉਹ ਕਹਿੰਦਾ ਹੈ ਕਿ ਸਮੇਂ—ਸਮੇਂ ਤੇ ਸਪਰੇਆਂ ਕੀਤੀਆਂ ਜਿਸ ਕਰਕੇ ਗੁਲਾਬੀ ਸੁੰਡੀ ਦਾ ਹਮਲਾ ਕੰਟਰੋਲ ਹੋਇਆ ਤੇ ਉਸਦੀ ਫਸਲ ਵੀ ਠੀਕ ਹੈ। ਉਹ ਆਖਦਾ ਹੈ ਕਿ ਜ਼ੇਕਰ ਖੇਤੀਬਾੜੀ ਵਿਭਾਗ ਅਤੇ ਪੰਜਾਬ ਖੇਤੀਬਾੜੀ ਯੁਨੀਵਰਿਸਟੀ ਦੀ ਸਲਾਹ ਅਨੁਸਾਰ ਖੇਤੀ ਕੀਤੀ ਜਾਵੇ ਤਾਂ ਸਫਲਤਾ ਜਰੂਰ ਮਿਲਦੀ ਹੈ।
ਕਿਸਾਨ ਕਹਿੰਦਾ ਹੈ ਕਿ ਉਸਨੂੰ ਉਮੀਦ ਹੈ ਕਿ ਉਹ 10 ਤੋਂ 11 ਕੁਇੰਟਲ ਪ੍ਰਤੀ ਏਕੜ ਨਰਮੇ ਦਾ ਝਾੜ ਪ੍ਰਾਪਤ ਕਰ ਲਵੇਗਾ। ਉਹ ਹੋਰਨਾਂ ਨਰਮਾਂ ਉਤਪਾਦਕਾਂ ਨੂੰ ਵੀ ਆਖਦਾ ਹੈ ਅਤੇ ਅਪੀਲ ਕਰਦਾ ਹੈ ਕਿ ਉਹ ਵੀ ਖੇਤੀਬਾੜੀ ਵਿਭਾਗ ਵੱਲੋਂ ਮਨਜੂਰਸ਼ੁਦਾ ਬੀਜਾਂ, ਕੀਟਨਾਸ਼ਕਾਂ ਅਤੇ ਖਾਦ ਤੇ ਸਪਰੇਆਂ ਦੀ ਵਰਤੋਂ ਕਰਨ ਅਤੇ ਲਗਾਤਾਰ ਆਪਣੇ ਖੇਤਾਂ ਤੇ ਨਜਰਸਾਨੀ ਬਣਾਈ ਰੱਖਣ ਤਾਂ ਜ਼ੋ ਫਸਲ ਨੂੰ ਖਰਾਬ ਹੋਣ ਤੋਂ ਬਚਾਇਆ ਜਾ ਸਕੇ ਅਤੇ ਚੰਗਾ ਝਾੜ ਪਾਪਤ ਕੀਤਾ ਜਾ ਸਕੇ।
ਉਹ ਨਰਮੇ ਦੀ ਫਸਲ ਦੀ ਸਫਲਤਾ ਮੁੱਖ ਮੰਤਰੀ ਸ: ਭਗਵੰਤ ਸਿੰਘ ਮਾਨ ਦੀ ਸਰਕਾਰ ਵੱਲੋਂ ਸਮੇਂ ਸਿਰ ਨਰਮੇ ਦੀ ਬਿਜਾਈ ਲਈ ਪਾਣੀ ਮੁਹਈਆ ਕਰਵਾਉਣ ਨੂੰ ਦਿੰਦਾ ਹੈ। ਉਹ ਆਖਦਾ ਹੈ ਕਿ ਸਮੇਂ ਸਿਰ ਬੀਜੀ ਗਈ ਫਸਲ ਹੋਰ ਕੁਦਰਤੀ ਮਾਰਾਂ ਅਤੇ ਕੀੜਿਆਂ ਦਾ ਹਮਲਾ ਵੱਧ ਸਹਾਰ ਲੈਂਦੀ ਹੈ। ਉਸਨੇ ਕਿਹਾ ਕਿ ਟੇਲ ਤੱਕ ਪਹੁੰਚੇ ਪਾਣੀ ਕਾਰਨ ਹੀ ਨਰਮੇ ਦੀ ਫਸਲ ਚੰਗੀ ਹੈ।
ਦੂਜ਼ੇ ਪਾਸੇ ਮੁੱਖ ਖੇਤੀਬਾੜੀ ਅਫਸਰ ਸ. ਗੁਰਮੀਤ ਸਿੰਘ ਚੀਮਾ ਨੇ ਕਿਹਾ ਕਿ ਖੇਤੀਬਾੜੀ ਮੰਤਰੀ ਪੰਜਾਬ ਸ. ਗੁਰਮੀਤ ਸਿੰਘ ਖੁੱਡੀਆਂ ਦੇ ਦਿਸ਼ਾ—ਨਿਰਦੇਸ਼ਾ ਤੇ ਖੇਤੀਬਾੜੀ ਵਿਭਾਗ ਨਰਮਾ ਉਤਪਾਦਕਾਂ ਦੀ ਫਸਲ ਦੇ ਬਚਾਅ ਤੇ ਸਮੇਂ—ਸਮੇਂ ਤੇ ਤਕਨੀਕੀ ਜਾਣਕਾਰੀ ਮੁਹੱਈਆ ਕਰਵਾਉਣ ਲਈ ਜਾਗਰੂਕਤਾ ਕੈਂਪ ਲਗਾਉਂਦਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਖੇਤੀਬਾੜੀ ਵਿਭਾਗ ਵੱਲੋਂ ਲਗਾਤਾਰ ਨਰਮਾ ਉਤਪਾਦਕਾਂ ਨਾਲ ਰਾਬਤਾ ਕਾਇਮ ਕੀਤਾ ਗਿਆ ਤੇ ਕਿਸਾਨਾਂ ਨੂੰ ਲੋੜ ਅਨੁਸਾਰ ਖਾਦਾ ਤੇ ਸਪਰੇਆਂ ਕਰਨ ਬਾਰੇ ਜਾਣਕਾਰੀ ਦਿੱਤੀ ਗਈ। ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਆਪਣੀ ਫਸਲ ਸਬੰਧੀ ਜਾਣਕਾਰੀ ਲਈ ਜ਼ਿਲ੍ਹਾ ਖੇਤੀਬਾੜੀ ਵਿਭਾਗ ਜਾਂ ਬਲਾਕ ਖੇਤੀਬਾੜੀ ਵਿਭਾਗ ਨਾਲ ਸੰਪਰਕ ਕੀਤਾ ਜਾ ਸਕਦਾ ਹੈ।
