`ਸਮਾਰਟ ਸਕੂਲ ਪਾਲਿਸੀ` ਤਹਿਤ ਸਕੂਲਾਂ ਦੀ ਬਦਲੀ ਨੁਹਾਰ ਨੂੰ ਪੇਸ਼ ਕਰਦਾ ਪ੍ਰੋਗਰਾਮ `ਨਵੀਆਂ ਪੈੜਾਂ`

ਇਸ ਵਾਰ ਖਿੱਚ ਦਾ ਕੇਂਦਰ ਬਣਿਆ ਗੁਣਾਤਮਿਕ ਸਿੱਖਿਆ ਵਿੱਚ ਨਵੇਂ ਨਕਸ਼ ਉਲੀਕਦਾ ਸਰਹੱਦੀ ਜ਼ਿਲ੍ਹਾ ਫ਼ਾਜ਼ਿਲਕਾ
ਫਾਜ਼ਿਲਕਾ, 4 ਜੁਲਾਈ,2021-

ਕੈਪਟਨ ਅਮਰਿੰਦਰ ਸਿੰਘ ਮੁੱਖ ਮੰਤਰੀ ਪੰਜਾਬ ਦੀ ਅਗਵਾਈ ਵਿੱਚ ਸਕੂਲ ਸਿੱਖਿਆ ਵਿਭਾਗ ਗੁਣਾਤਮਿਕ ਸਿੱਖਿਆ ਦੇ ਟੀਚਿਆਂ ਦੀ ਪ੍ਰਾਪਤੀ ਕਰਦਾ ਹੋਇਆ ਨਿੱਤ ਦਿਨ ਨਵੇਂ ਪੂਰਨੇ ਪਾ ਰਿਹਾ ਹੈ।ਇਹਨਾਂ ਉਪਰਾਲਿਆਂ ਦੀ ਲੜੀ ਵਿੱਚ ਹਰ ਸ਼ਨੀਵਾਰ ਸਰਕਾਰੀ ਸਕੂਲਾਂ ਦੇ ਮੂੰਹ ਬੋਲਦੇ ਨਕਸ਼ ਉਭਾਰਦਾ ਹਫ਼ਤਾਵਾਰੀ ਪ੍ਰੋਗਰਾਮ `ਨਵੀਆਂ ਪੈੜਾਂ` ਸੱਚਮੁੱਚ ਹੀ ਸਰਕਾਰੀ ਸਕੂਲਾਂ ਦੀ ਸਿੱਖਿਆ ਵਿੱਚ ਆਏ ਕ੍ਰਾਂਤੀਕਾਰੀ ਬਦਲਾਅ ਦੀ ਛਾਪ ਛੱਡ ਰਿਹਾ ਹੈ।
ਪ੍ਰੋਗਰਾਮ ਦੀ ਸ਼ੁਰੂਆਤ ਮੰਚ ਸੰਚਾਲਕ ਅਮਰਦੀਪ ਸਿੰਘ ਬਾਠ ਅਤੇ ਰਾਕੇਸ਼ ਸ਼ਰਮਾ ਡੀ ਐੱਸ ਐੱਮ ਦੀ ਲਾਜਵਾਬ ਲਫ਼ਜ਼ੀ ਪੇਸ਼ਕਾਰੀ ਨਾਲ ਹੋਈ।ਜਿਲ੍ਹਾ ਸਿੱਖਿਆ ਅਫਸਰ ਸਕੈਂਡਰੀ ਡਾ ਤ੍ਰਿਲੋਚਨ ਸਿੰਘ, ਜਿਲ੍ਹਾ ਸਿੱਖਿਆ ਅਫਸਰ ਐਲੀਮੈਂਟਰੀ ਡਾ.ਸੁਖਵੀਰ ਸਿੰਘ ਬੱਲ ਨੈਸ਼ਨਲ ਅਵਾਰਡੀ, ਉੱਪ ਜਿਲ੍ਹਾ ਸਿੱਖਿਆ ਅਫਸਰ ਸਕੈਂਡਰੀ ਬ੍ਰਿਜ ਮੋਹਨ ਸਿੰਘ ਬੇਦੀ , ਉੱਪ ਜਿਲ੍ਹਾ ਸਿੱਖਿਆ ਅਫਸਰ ਐਲੀਮੈਂਟਰੀ ਮੈਡਮ ਅੰਜੂ ਸੇਠੀ ਦੀ ਅਗਵਾਈ ਅਤੇ ਜਿਲ੍ਹੇ ਦੇ ਸਮੂਹ ਅਧਿਆਪਕਾਂ ਦੀ ਮਿਹਨਤ ਨੂੰ ਸਮਰਪਿਤ ਇਸ ਵਾਰ ਦਾ ਪ੍ਰੋਗਰਾਮ ਸਮਾਰਟ ਸਕੂਲ ਮੁਹਿੰਮ ਦੀ ਹਾਮ੍ਹੀ ਭਰਦਾ ਹੋਇਆ ਸਰਹੱਦੀ ਜ਼ਿਲ੍ਹੇ ਫਾਜ਼ਿਲਕਾ ਦੇ ਸਮਾਰਟ ਸਕੂਲਾਂ ਦੀ ਮੂੰਹ ਬੋਲਦੀ ਤਸਵੀਰ ਪੇਸ਼ ਕਰ ਰਿਹਾ ਸੀ।
ਇਸ ਦੌਰਾਨ ਸੰਨ 1862 ਵਿੱਚ ਸਥਾਪਿਤ ਹੋਏ ਜ਼ਿਲ੍ਹੇ ਦੇ ਵਿਰਾਸਤੀ ਸਕੂਲ ਸਸਸਸ (ਲੜਕੇ) ਅਬੋਹਰ, ਸਸਸਸ(ਲੜਕੀਆਂ) ਅਬੋਹਰ, ਸੰਨ 1913 ਵਿੱਚ ਸਥਾਪਿਤ ਪੁਰਾਤਨ ਸਕੂਲ ਸਸਸਸਸ (ਲੜਕੀਆਂ) ਫ਼ਾਜ਼ਿਲਕਾ, ਸਸਹਸ,ਹੀਰਾਂ ਵਾਲੀ, ਸਸਸਸ ਨਿਹਾਲ ਖੇੜਾ ਦੀਆਂ ਗੁਣਾਤਮਿਕ ਸਿੱਖਿਆ ਦੀਆਂ ਵਿਸ਼ੇਸ਼ਤਾਵਾਂ ਜਿਵੇਂ ਵੋਕੇਸ਼ਨਲ ਲੈਬਾਟਰੀਆਂ, ਖੂਬਸੂਰਤ ਸਿੱਖਿਆ ਪਾਰਕ, ਸਮਾਰਟ ਜਮਾਤ ਕਮਰੇ, ਆਕਰਸ਼ਕ ਫਰਨੀਚਰ, ਸੰਗੀਤ ਲੈਬਾਟਰੀਆਂ, ਖੇਡ ਮੈਦਾਨ, ਐੱਨ ਸੀ ਸੀ ਦੀ ਖੂਬਸੂਰਤ ਵੀਡੀਓਗ੍ਰਾਫੀ ਕਾਬਿਲ-ਏ-ਤਾਰੀਫ਼ ਸੀ। ਸਕੂਲ ਮੁਖੀਆਂ ਵੱਲੋਂ ਆਪਣੇ-ਆਪਣੇ ਸਕੂਲਾਂ ਦੀਆਂ ਸਰਵਪੱਖੀ ਵਿਕਾਸ ਦੀਆਂ ਕਹਾਣੀਆਂ ਵੀ ਬਿਆਨ ਕੀਤੀਆਂ ਗਈਆਂ। ਇਸ ਤੋਂ ਬਾਅਦ ਬਿਲਕੁੱਲ ਬਾਰਡਰ ਅਤੇ ਦਰਿਆ ਦੇ ਪਰਲੇ ਪਾਰ ਦੇ ਸਕੂਲ ਸਪ੍ਰਾਸਕੂਲ ਢਾਣੀ ਨੱਥਾ ਸਿੰਘ ਦੀ ਆਕਰਸ਼ਕ ਇਮਾਰਤ, ਸਮਾਰਟ ਜਮਾਤਾਂ, ਸਿੱਖਿਆ ਪਾਰਕਾਂ, ਸਿੱਖਿਆ ਲੈਬਾਟਰੀਆਂ ਅਤੇ ਪੜ੍ਹਾਈ ਦੀ ਗੁਣਵੱਤਾ ਬਾਰੇ ਸਬੰਧਿਤ ਬਲਾਕ ਪ੍ਰਾਇਮਰੀ ਸਿੱਖਿਆ ਅਫ਼ਸਰ ਨੇ ਜਾਣਕਾਰੀ ਦਿੱਤੀ।
ਅੰਤ ਵਿੱਚ ਪੰਜਾਬ ਦੇ ਨਾਮਵਾਰ ਸਕੂਲਾਂ ਦੀ ਸ਼੍ਰੇਣੀ ਵਿੱਚ ਸ਼ੁਮਾਰ, ਪੰਜਾਬ ਦੇ ਪਹਿਲੇ ਪੂਰਨ ਤੌਰ `ਤੇ ਏ ਸੀ ਦੀ ਸਹੂਲਤ ਨਾਲ ਲੈੱਸ ਅਤੇ ਹਰ ਖੇਤਰ ਵਿੱਚ ਚਾਨਣ ਬਿਖੇਰਦੇ ਸਪ੍ਰਾਸਕੂਲ ਚੰਨਣਵਾਲਾ ਦੀ ਸੱਭਿਆਚਾਰ ਨੂੰ ਪ੍ਰਫੁੱਲਿਤ ਕਰਦੀ ਅਤੇ ਹਾਈਟੈੱਕ ਸਹੂਲਤਾਂ ਵਾਲੀ ਇਮਾਰਤ, ਸੋਹਣੇ ਪਾਰਕ, ਸਮਾਰਟ ਕਲਾਸਰੂਮ ਅਤੇ ਵਿਦਿਆਰਥੀਆਂ ਦੀ ਸੱਭਿਆਚਾਰਕ ਪੇਸ਼ਕਾਰੀ ਦੀ ਤਸਵੀਰ ਵੇਖਣ ਨੂੰ ਮਿਲੀ। ਸਕੂਲ ਮੁੱਖੀ ਲਵਜੀਤ ਸਿੰਘ ਗਰੇਵਾਲ ਸਕੂਲ ਮੁਖੀ ਨੇ ਸਕੂਲ ਦੇ ਵਿਕਾਸ ਦੀ 100 ਦਿਨਾਂ ਦੀ ਕਹਾਣੀ ਦਰਸ਼ਕਾਂ ਨਾਲ ਸਾਂਝੀ ਕੀਤੀ।
ਪ੍ਰੋਗਰਾਮ ਦੌਰਾਨ ਵਿਦਿਆਰਥੀਆਂ ਦੇ ਮਾਪਿਆਂ ਨੇ ਸਰਕਾਰੀ ਸਕੂਲਾਂ ਦੀ ਸਮਾਰਟ ਗੁਣਾਤਮਿਕ ਸਿੱਖਿਆ ਅਤੇ ਮਿਹਨਤੀ ਅਧਿਆਪਕਾਂ ਦੀ ਪ੍ਰਸ਼ੰਸਾ ਕੀਤੀ।ਸਰਹੱਦੀ ਜ਼ਿਲ੍ਹੇ ਦੇ ਵੱਖ-ਵੱਖ ਸਕੂਲਾਂ ਦੇ ਵਿਦਿਆਰਥੀਆਂ ਦੀਆਂ ਇੰਗਲਿਸ਼ ਬੂਸਟਰ ਕਲੱਬ ਅਧੀਨ ਅੰਗਰੇਜ਼ੀ ਵਾਰਤਾਲਾਪ, ਸੱਭਿਆਚਾਰਕ ਲੋਕਗੀਤ,ਲੋਕਨਾਚ,ਲੈਬਾਟਰੀਆਂ ਵਿੱਚ ਵਿਗਿਆਨਕ ਤਜ਼ਰਬੇ, ਸੰਗੀਤਕ ਸਾਜ਼ਾਂ ਦੀ ਪੇਸ਼ਕਾਰੀ, ਖੇਡਾਂ ਅਤੇ ਕਰਾਟੇ ਦੀਆਂ ਵਿਲੱਖਣ ਪੇਸ਼ਕਾਰੀਆਂ ਨੇ ਦਰਸ਼ਕਾਂ ਨੂੰ ਬਹੁਤ ਪ੍ਰਭਾਵਿਤ ਕੀਤਾ।