ਬੱਚਿਆਂ ਦੀ ਰੀੜ੍ਹ ਦੀ ਹੱਡੀ ਦੀ ਸ਼ਕਲ ਬਦਲਣਾ ਹੁਣ ਕੋਈ ਸਰਾਪ ਨਹੀਂ, ਅਜਿਹੇ ਬੱਚਿਆਂ ਦੀ ਜ਼ਿੰਦਗੀ ‘ਚ ਤਬਦੀਲੀ ਸੰਭਵ : ਡਾ: ਦੀਪਕ ਜੋਸ਼ੀ

ਇਲਾਜ ਵਿੱਚ ਦੇਰੀ ਬੱਚੇ ਦੀ ਰੀੜ੍ਹ ਦੀ ਹੱਡੀ ਨੂੰ ਨੁਕਸਾਨ ਪਹੁੰਚਾ ਸਕਦੀ ਹੈ, ਜਿਸ ਨਾਲ ਉਸਦੇ ਦਿਲ ਅਤੇ ਫੇਫੜਿਆਂ ਦੇ ਕੰਮਕਾਜ ਪ੍ਰਭਾਵਿਤ ਹੋ ਸਕਦੇ ਹਨ

ਰੀੜ੍ਹ ਦੀ ਹੱਡੀ ਦੀਆਂ ਜਟਿਲ ਬਿਮਾਰੀਆਂ ਤੋਂ ਪੀੜਤ ਨਾਬਾਲਗ ਹੋ ਰਹੇ ਹਨ ਠੀਕ : ਡਾ. ਦੀਪਕ ਜੋਸ਼ੀ

ਬਠਿੰਡਾ, 19 ਜੂਨ, 2024

ਕਿਸ਼ੋਰ ਅਵਸਥਾ ਵਿੱਚ ਰੀੜ੍ਹ ਦੀ ਹੱਡੀ ਦਾ ਇੱਕ ਪਾਸੇ ਝੁਕਣਾ ਜਾਂ ਆਕਾਰ ਬਦਲਣ (ਸਕੋਲੀਓਸਿਸ)  ਨਾਲ ਬੱਚੇ ਦੀ ਰੀੜ੍ਹ ਦੀ ਹੱਡੀ ਨੂੰ ਨੁਕਸਾਨ ਪਹੁੰਚ ਸਕਦਾ ਹੈ ਅਤੇ ਉਸ ਦੇ ਦਿਲ ਅਤੇ ਫੇਫੜਿਆਂ ਦੇ ਕੰਮ ਵੀ ਪ੍ਰਭਾਵਿਤ ਹੋ ਸਕਦੇ ਹਨ, ਉਥੇ ਹੀ ਹੁਣ ਹੱਡੀਆਂ ਦੇ ਇਲਾਜ ਵਿਚ ਆਈ ਤਕਨੀਕੀ ਕ੍ਰਾਂਤੀ ਦੇ ਨਾਲ ਸਕੋਲੀਓਸਿਸ ਤੋਂ ਪੀੜਤ ਅਜਿਹੇ ਬੱਚਿਆਂ ਦੀ ਜ਼ਿੰਦਗੀ ‘ਚ ਬਦਲਾਅ ਲਿਆਂਦਾ ਜਾ ਸਕਦਾ ਹੈ, ਇਹ ਗੱਲ ਅੱਜ ਬਠਿੰਡਾ ‘ਚ ਆਯੋਜਿਤ ਪ੍ਰੈੱਸ ਕਾਨਫਰੰਸ ‘ਚ ਪ੍ਰਸਿੱਧ ਆਰਥੋਪੀਡਿਕ ਮਾਹਿਰ ਡਾ. ਦੀਪਕ ਜੋਸ਼ੀ ਨੇ ਕਹੀ, ਜਿਨ੍ਹਾਂ ਵਲੋਂ ਹਾਲ ਹੀ ਵਿਚ ਹੱਡੀਆਂ ਦੇ ਇਲਾਜ ਦੀ ਨਵੀਨਤਮ ਤਕਨਾਲੋਜੀ ਨਾਲ ਰੀੜ੍ਹ ਦੀ ਹੱਡੀ ਦੀ ਖਰਾਬੀ ਤੋਂ ਪੀੜਤ ਨਾਬਾਲਗ ਬੱਚਿਆਂ ਦੀ ਜ਼ਿੰਦਗੀ ‘ਚ ਬਦਲਾਅ ਲਿਆਇਆ ਗਿਆ ਹੈ, ਜੋ ਕਿ ਉੱਤਰੀ ਭਾਰਤ ਵਿੱਚ ਆਪਣੀ ਕਿਸਮ ਦੀ ਪਹਿਲੀ ਸਰਜਰੀ ਵੀ ਹੈ।

ਇਸ ਮੌਕੇ ਬੋਲਦਿਆਂ ਫੋਰਟਿਸ ਹਸਪਤਾਲ ਮੋਹਾਲੀ ਦੇ ਆਰਥੋਪੈਡਿਕਸ ਅਤੇ ਸਪਾਈਨ ਵਿਭਾਗ ਦੇ ਐਡੀਸ਼ਨਲ ਡਾਇਰੈਕਟਰ ਡਾ. ਦੀਪਕ ਜੋਸ਼ੀ ਨੇ ਕਿਹਾ ਕਿ ਸਕੋਲੀਓਸਿਸ ਜਮਾਂਦਰੂ ਹੋ ਸਕਦਾ ਹੈ ਜਾਂ ਕਿਸ਼ੋਰ ਅਵਸਥਾ ਦੌਰਾਨ ਹੋ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਕੋਲੀਓਸਿਸ ਜਿਆਦਾਤਰ 10 ਤੋਂ 16 ਸਾਲ ਦੀ ਉਮਰ ਦੇ 2 ਤੋਂ 4 ਪ੍ਰਤੀਸ਼ਤ ਬੱਚਿਆਂ ਵਿੱਚ ਹੁੰਦਾ ਹੈ। ਲੜਕੇ ਅਤੇ ਲੜਕੀਆਂ ਬਰਾਬਰ ਪ੍ਰਭਾਵਿਤ ਹੁੰਦੇ ਹਨ। ਹਾਲਾਂਕਿ, ਲੜਕੀਆਂ ਵਿੱਚ ਸਕੋਲੀਓਸਿਸ ਹੋਣ ਦੀ ਸੰਭਾਵਨਾ 10 ਗੁਣਾ ਜ਼ਿਆਦਾ ਹੁੰਦੀ ਹੈ। ਉਸਨੇ ਕਿਹਾ ਕਿ ਸਕੋਲੀਓਸਿਸ ਰੀੜ੍ਹ ਦੀ ਇੱਕ ਪਾਸੇ ਵੱਲ ਵਕਰ ਹੈ ਅਤੇ ਅਕਸਰ ਕਿਸ਼ੋਰਾਂ ਵਿੱਚ ਨਿਦਾਨ ਕੀਤਾ ਜਾਂਦਾ ਹੈ। ਇਹ ਆਮ ਤੌਰ ‘ਤੇ ਇਡੀਓਪੈਥਿਕ ਹੁੰਦਾ ਹੈ, ਭਾਵ ਇਹ ਕਿਸੇ ਖਾਸ ਕਾਰਨ ਕਰਕੇ ਨਹੀਂ ਹੁੰਦਾ। ਉਨ੍ਹਾਂ ਦੱਸਿਆ ਕਿ ਉਹ ਕਾਈਫੋਸਿਸ, ਅਡੋਲੈਸੈਂਟ ਇਡੀਓਪੈਥਿਕ ਸਕੋਲੀਓਸਿਸ, ਕਨਜੇਨਿਟਲ ਸਕੋਲੀਓਸਿਸ ਅਤੇ ਨਿਊਰੋਮਸਕੂਲਰ ਸਕੋਲੀਓਸਿਸ ਵਰਗੀਆਂ ਬਿਮਾਰੀਆਂ ਤੋਂ ਪੀੜਤ ਬਹੁਤ ਸਾਰੇ ਨਾਬਾਲਗ ਮਰੀਜ਼ਾਂ ਦਾ ਇਲਾਜ ਕਰ ਚੁਕੇ ਹਨ।

ਡਾ. ਦੀਪਕ ਜੋਸ਼ੀ ਨੇ ਦੱਸਿਆ ਕਿ ਹਾਲ ਹੀ ਵਿੱਚ ਉਨ੍ਹਾਂ ਦੇ ਆਰਥੋਪੈਡਿਕਸ ਸਪਾਈਨ ਵਿਭਾਗ ਦੇ ਸਕੋਲੀਓਸਿਸ ਡਿਵੀਜ਼ਨ ਨੇ ਬਠਿੰਡਾ ਦੇ ਇੱਕ 14 ਸਾਲਾਂ ਦੇ ਲੜਕੇ ਨੂੰ ਜਮਾਂਦਰੂ ਹੈਮੀਵਰਟੇਬਰਾ (ਉਸ ਦੀ ਰੀੜ੍ਹ ਦੀ ਹੱਡੀ ਦਾ ਇੱਕ ਹਿੱਸਾ ਵਿਕਸਤ ਨਹੀਂ ਹੋ ਰਿਹਾ ਸੀ) ਨਾਲ ਪੈਦਾ ਹੋਇਆ ਸੀ, ਜਿਸ ਕਾਰਨ ਉਸ ਦੀ ਪਿੱਠ ਦੇ ਮੱਧ ਭਾਗ ਵਿੱਚ ਗੰਭੀਰ ਮੋੜ ਆ ਗਿਆ ਸੀ, ਜਿਸ ਕਾਰਨ ਉਸ ਨੂੰ ਅੱਗੇ ਵੱਲ ਝੁਕਣਾ ਪੈਂਦਾ ਸੀ। ਇਲਾਜ ਵਿੱਚ ਦੇਰੀ ਦੇ ਨਤੀਜੇ ਵਜੋਂ ਬੱਚੇ ਵਿੱਚ ਇੱਕ ਅਜੀਬ ਵਿਕਾਰ ਹੋ ਸਕਦਾ ਸੀ, ਜਿਸ ਨਾਲ ਉਸਦੇ ਵਿਕਾਸ ਅਤੇ ਮਹੱਤਵਪੂਰਣ ਅੰਗਾਂ ’ਤੇ ਅਸਰ ਪੈਂਦਾ।

ਡਾ. ਜੋਸ਼ੀ ਦੀ ਅਗਵਾਈ ਹੇਠ ਡਾਕਟਰਾਂ ਦੀ ਟੀਮ ਨੇ ਹਾਲ ਹੀ ਵਿੱਚ 4 ਘੰਟੇ ਦੀ ਸਰਜਰੀ ਦੌਰਾਨ ਇੱਕ ਨੌਜਵਾਨ ਮਰੀਜ਼ ’ਤੇ ’ਹੇਮੀ-ਵਰਟੈਬਰਾ ਐਕਸਾਈਜ਼ਨ ਐਂਡ ਕਾਈਫੋਸਕੋਲੀਓਸਿਸ ਕੋਰੈਕਸ਼ਨ’ ਦੀ ਇੱਕ ਦੁਰਲੱਭ ਪ੍ਰਕਿਰਿਆ ਨੂੰ ਸਫਲਤਾਪੂਰਵਕ ਕੀਤਾ। ਬੱਚੇ ਨੇ ਸਰਜਰੀ ਤੋਂ ਅਗਲੇ ਹੀ ਦਿਨ ਤੁਰਨਾ ਸ਼ੁਰੂ ਕਰ ਦਿੱਤਾ ਅਤੇ ਤਿੰਨ ਦਿਨਾਂ ਬਾਅਦ ਉਸ ਨੂੰ ਹਸਪਤਾਲ ਤੋਂ ਬਿਨਾਂ ਬ੍ਰੇਸ ਦੇ ਛੁੱਟੀ ਦੇ ਦਿੱਤੀ ਗਈ। ਉਹ ਪੂਰੀ ਤਰ੍ਹਾਂ ਠੀਕ ਹੋ ਗਿਆ ਹੈ ਅਤੇ ਅੱਜ ਆਮ ਜੀਵਨ ਬਤੀਤ ਕਰ ਰਿਹਾ ਹੈ।

ਇੱਕ ਹੋਰ ਮਾਮਲੇ ਵਿੱਚ, ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਦੇ ਇੱਕ 14 ਸਾਲਾ ਲੜਕੇ ਦਾ ਜਨਮ ਰੀੜ੍ਹ ਦੀ ਹੱਡੀ ਦੇ ‘ਜਮਾਂਦਰੂ ਕੀਫੋਸਿਸ’ ਨਾਲ ਹੋਇਆ ਸੀ, ਜਿਸ ਵਿੱਚ ਬੱਚੇ ਦੀ ਰੀੜ੍ਹ ਦੀ ਹੱਡੀ ਦਾ ਗਰਭ ਵਿੱਚ ਸਹੀ ਢੰਗ ਨਾਲ ਵਿਕਾਸ ਨਹੀਂ ਹੋਇਆ ਸੀ। ਡਾ. ਜੋਸ਼ੀ ਨੇ ਮਰੀਜ ’ਤੇ ‘ਪੈਡੀਕਲ ਸਬਟਰੈਕਸ਼ਨ ਓਸਟੀਓਟੋਮੀ (ਪੀਐਸਓ)’ ਕੀਤਾ, ਜਿਸ ਨਾਲ ਰੀੜ੍ਹ ਦੀ ਹੱਡੀ ਠੀਕ ਹੋ ਗਈ। ਬੱਚਾ ਅਗਲੇ ਦਿਨ ਚੱਲਣ ਦੇ ਯੋਗ ਹੋ ਗਿਆ ਅਤੇ ਤੀਜੇ ਦਿਨ ਛੁੱਟੀ ਦੇ ਦਿੱਤੀ ਗਈ।